اصبر شوية...

5 من أكثر المشاكل الجنسية شيوعا عند العيالات

بزاف ديال العيالات كيعانيو من مشاكل فالممارسة الجنسية وعاشوها شي مرة فمرحلة من مراحل الحياة ديالهم. بعض المرات مثلا الكانة للكوى ما كتكونش، وبعض المرات الكانة كاينة ولكن الممارسة كيكون فيها الحريق والوجع. فهاد الموضوع غادي نتعرفو على أكثر المشاكل الجنسية شيوعا عند العيالات وكيفاش الواحد يتعامل معاها.

نقص فالرغبة
بعض المرات هو كيكون ناشط وفيه ما يقلب ويشقلب، ولكن نتي ما عندك كانة للكوى. نقص الرغبة الجنسية وحدة من المشاكل المعروفة عند العيالات، ومن المشاكل اللّي عندها تأثير كبير على العلاقة، حيت الراجل كيقدر يقراها فشكل، كيرد راسو هو السبب حيت كيبدا يشكك فالأداء ديالو، أو كيقول بلّي راه ما بقاتش باغياني كيف ما شحال هادي، مع أن السبب يقدر يكون حاجة أخرى.
التوتر والقلق، والتعب ديال الخدمة، أفكار خاطئة على الجنس أو شي تجربة جنسية خايبة، ويمكن حتى نقص الإشباع العاطفي .. كلها عوامل تقدر تأثر على الرغبة الجنسية عند المرا. نقص الرغبة من أعقد المشاكل اللّي كتعيشهم المرا، حيت الأسباب دائما ذاتية ومتشابكة وكتختلف من مرا لمرا.
بعض المرات يقدر يكون البال مرتاح وعاطفيا الأمور مزيانة، ولكن شي حالات مرضية، بحال مرض السكر أو تغييرات هرمونية عندها علاقة بالسن يمكن تأثر على الرغبة فالجنس. الطريقة باش تحافظي على الرغبة الجنسية كتوقّف على أسباب النقص ديالها. بالنسبة للعيالات اللّي صغارات ومازال كتجيهم الدم بانتضام، الأسباب غالبا عندها علاقة بالتوتر والقلق والضغط ديال الحياة اليومية أو مشاكل العلاقة العاطفية. هذا علاش حاولي تنقصي من التوتر وتحافظي على الحيوية والنشاط ديال الجسم ديالك بالتغذية المتوازنة والرياضة، وحاولي تصلحي العلاقة إذا كان فيها مشاكل.

مشكلة فالاستثارة
كاين اللّي كيربط عدم الشهوة والاستثارة بالنشوفية ديال التوتو فالممارسة. المشكلة ديال التهييج والاستثارة عند المرا ماشي هي أن المرا ما كتفزكزش وصافي، المشكلة هي أن المرا ما كتسخنش. حيت المرا ملّي كتسخن، الدورة الدموية فالأعضاء الحميمية ديالها كتزاد، الدم كينزل للتوتو والكليتوريس، والعروق فديك البلاصة كيعمرو، الشي اللّي كيخلّي الفريخ يتنفخ والفتحة ديال التوتو توساع، بالعربية الجسم كيستعد للكوى. أما ملّي المرا ما كتسخنش، التوتو ديالها ما كيفزكش وما كيكونش مستعد والكوية كتعنكش. إذا كان التوتو ناشف، المرا ما غاديش تحس بالمتعة والنشوة فالممارسة. ونفس الأسباب اللّي تقدر تنقص الرغبة الجنسية عند المرا تقدر تكون سبب مشاكل الاستثارة، زيد عليها التبرزيط والبال المشغول ديما بالمشاكل ديال الخدمة، الدار أو الدراري، الشّي اللّي كيصعب عليها تطلقها وتترخى.
حاولي ترخاي وتخوي بالك، وبداو تعطيو للتسخينات والمداعبات حقها، تقدري تستعملي مرطب Lubrifiant من اللّي كيتباعو فالصيدلية باش تسهلي الإيلاج. كاين مرطبات ديال الزيت وكاين اللّي ما فيهش الزيت، اللي فيه الزيت كيصبر، ولكن اللّي ما فيهش الزيت كيعطي إحساس طبيعي بالرطوبة، وما كيقطعش البروتكس بحال ديال الزيت. وديري فالبال بلّي Vasline راه ماشي مُرطب.
بعض المرات، السبب يقدر يكون هرموني، بحال مثلا النقص ديال هرمون الإستروجين اللّي يقدر يسبب النشوفية ديال التوتو. فهاد الحالة كاين هرمونات بديلة، وهي أدوية كيعطيها اختصاصي من بعد ما كيشخص الحالة ديالك باش الجسم ديالك يقاد الميل ويعوض النقص.

الراس ما كيجيش
كاينين عيالات ما كيجيبوهش، وهي من المشاكل اللّي كيعيشوها بزاف. كاين منهم اللّي عمرها جابتو وكاين اللّي كانت كتجيبو وما بقاتش. بعض العيالات ماشي مهم عندهم الأوركازم باش يدوزو وقيتة زوينة فالفراش، ولكن مشكلة انعدام الرعشة بمرة تقدر تولي مع الوقت مشكلة اللّي تضر الطرفين بجوج وتأثر على العلاقة كلها.
الأسباب تقدر تكون نفسية مرتبطة بالكانة، التوتر والقلق والضغط، أو حيت ما كيتعطاش للممارسة حقها من التسخينات واللّعب، أو يمكن بسبب شي تجربة خايبة. وبعض المرات يقدر يكون السبب استهلاك أدوية ديال الاكتئاب، أو شي مرض كيأثر على الأعصاب، بحال السكر و التصلب اللّويحي، يا إما شي مشكل فالتوتو، وهاد الحالات المرضية كتبان وساهل التشخيص ديالها، حيت الأعراض ديالها ما كتبانش غير فالأوركازم.

الحريق فالممارسة
كاينين عيالات كيحسو بالحريق فالممارسة الجنسية، خصوصا مع الإيلاج والدّيه وجيبو، وهادي قضية كاينة كيعانيوها بزاف غير هو كيحشمو يعبّرو عليها. هاد الحالة سميتها عسر الجماع Dyspareunie اللّي السبب ديالها فالغالب كيكون تشنج المهبل Vaginisme، كاين اللّي كيعتبرهم حالة وحدة، أو دورة كل وحدة كتدي لختها، وكاين اللّي كيتعامل معاهم كجوج حالات مختالفين، حيت بيناتهم اختلافات فالأسباب والأعراض، واخا النتيجة نفسها والحريق هو هو.
تشنج المهبل هو ملّي العضلات ديال التوتو كتعصّب لا إراديا وكتسد التوتو ومكتخليش زيزي يدخل، وكتصعب الإيلاج وكيولي داكشي فيه الحريق. الأسباب ديال التشنج تقدر تكون نفسية، بحال الخوف من الحريق أو من الحمل، أو مشكل عاطفي أو شي تجربة خايبة. ويقدر يكون السبب عضوي بحال شي التهاب أو مرض فالمسالك البولية.
عسر الجماع أو الحريق بصفة عامة، الأسباب ديالو فيها النفسي وفيها العضوي. يقدر يكون السبب فيه تشنج المهبل، ويقدر يكون السبب عندو علاقة بحالات اخرى بحال النشوفية ديال التوتو، عدوى المسالك البولية، أو حالة انتباذ باطني Endométriose، وهي ملّي كيبداو أنسجة بحال البطانة ديال الرحم كتكبر فالتوتو برا الرحم. هاد الأنسجة فالرحم كتفتت فالآخر ديال الدورة الشهرية وكتخرج دم، ولكن ملّي كتكبر برا الرحم كتنفخ وكتلصّق وكدّير المشاكل، من بينها الحريق. هاد الحالة كتطور مع الوقت ولكن كتعالج.
الحل ديال المشكلة كيرتبط بالمعرفة ديال السبب منين جاية، هذا علاش مزيان تشاوري مع اختصاصي فهادشي، خصوصا إذا كانو الأعراض كيتزادو مع الوقت أو شكيتي بلّي السبب عندو علاقة بشي مرض. وديري فالبال بلّي كاينة حلول لهاد المشكلة وكاين ديما ما يدار باش الأمور تحسن.

خلّي تعليق

الإيميل ديالك ما غاديش يبان للناس.