اصبر شوية...

5 ديال الحاجات إذا بغيتو تّكاواو مزيان فالبرد

فاش كيبرد الحال ومع السميقلي، بنادم ما كيفكر غير فحاجة وحدة، هي يتخشى تحت المانطة ويتكمش ويسخّن جنابو. واخا تكون عندو الكانة للكوى، ما كيعرفش كي يدير ليه. جيبييه كتقدم ليكم بعض النصائح اللّي يقدرو يحسنو الرغبة الجنسية ويعاونوكم تسخنو الطرح فوقت اللّي فيه البرد ما كيعاونش.

راجعو المداعبات
فالشتا، وفاش كيكون البرد بزاف، كنحسو براسنا مهدودين، فاشلين وعيانين، وغالبا ما كيكون فينا الجهد لحتى شي مجهود. علاش اللّي ما نعتابروش هاد الوقت فرصة مزيان نستغلوها فأننا نراجعو المداعبات الأولية ديال الكوى مع بعضياتنا؟ نتعانقو، نتقايسو، نتباوسو، نديرو ماساج مثير لبعضنا… كولشي هادشي بالتاويل، بشوية وبلا زربة، بحال إلا كنحاولو نعاودو نكتاشفو الأجسام ديالنا، وفنفس الوقت كندفيو راسنا ونسخنو بعضياتنا وحنا كنفرشو لشي كوية فاعلة حارقة.

مشاهدة الأفلام الرومانسية
فوقت البرد والزمهرير، لفراجة فالتلفازة كتكون مخيرة وخصوصا فشي مسلسل كيعجبكوم بجوج، ولكن إذا بدلتو داكشي اللّي موالفين بشي فيلم رومانسي يمكن يكون احسن وغادي يقدر يشعلكوم. يمكن شي لقطة من الفيلم تفكركوم فشي حاجة شحال هادي ما درتوها، أو تلهمكوم تجربو شي حاجة جديدة، علاش لا؟

 

 حيدو لعكز
أكبر أعداء الرغبة الجنسية واللّي كيقضي عليها هو لعكز. باغيين تكاواو ولكن مافيكوم ما تحيدو حوايجكوم، كتفكرو فاللباس ديال الحوايج من بعد ما تجيبو راسكوم، طاح الليل وتعشيتو وعيانين وفيكوم النعاس… السبة اللّي تخليكوم ما تكاواوش ديما غادي تكون إذا عطيتوها فرصة تحرمكوم من متعة الكوى. من الأفضل تجرّيو على العكز وتعريو على شهوتكم، تبدلو الروتين ديال التكامش فالكواش، وتجربو دّيرو نشاطات مع بعضكم بحال شي عشيوة سخيخنة بالمساخن، مع الشميعات وفاص آفاص، وبشي موسيقى اللّي تعجبكوم… ماشي لابدا تنظمو وتجاريو باش تحييو ليلة من داكشي، ولكن على قد القياس، وبلا قوة التوجاد، حيت المهم هو تعيشو اللّحظة بجوج، وتقربو من بعضكم اكثر.

بقاو بتقاشركوم
كتبان هاد القضية فشكل، ولكن علميا حسب دراسة تدارت فـ 2005 من طرف باحثين من جامعة خرونينغن فهولندا، لقاو بلّي الكوى بالتقاشر كيزيد المتعة الجنسية فالفراش، حيت كيأثرو على الشهوة والأوركازم، وإذا ما كناش لابسينهم يمكن نتعنكشو حتى وحنا كنجيبوه. جربي قيسيه فأي بلاصة من الجسم ديالو برجليك مجمدين، وشوفيه كي غادي يتبورش ويتشكرف، الشّي اللّي يقدر يشتت الانتباه ديالو ويتلّف ليه التركيز فاللّحظة فاش نتوما شادين الستون، بغض النظر على أن البرودية ديال الرجلين تقدر نتي براسك تعنكشك وتخليك تبقاي تّفكريهوم ونتي كتكاواي. الجسم كيمكن يسخن إذا سخنو الرجلين، وإذا ما سخنوش كيصعاب يسخن!

اختيار الوضعيات
كاينين وضعيات كيصلاحو فاش كيكون الكز والسميقلي، فالوقت اللّي كيحتاج الواحد الحنان والرومانسية والدفء، الوضعيات السخونة بحال : وضعية المعيلقة فاش كيكون الراجل من وراك ونتوما ناعسين جنب، وضعية المحاكّة فاش كيطلع فوق منك وهو ملاصق معاك، وضعية القايدة فوق منو جالسة عليه وصدرك على صدرو… زيد وزيد، موجودين بزاف اللّي تقدرو تكتاشفوهوم لراسكوم، أو تقلبو شوية وتنبشو فجيبيه وضعيات، وفنفس الوقت تزيدو تعرفو على الوضعيات اللّي يمكن توافقكوم وتمتعكوم اكثر.

خلّي تعليق

الإيميل ديالك ما غاديش يبان للناس.