اصبر شوية...

16 حاجة كيبغيها الراجل فالفراش وما كيطلبهاش

كاينين بزاف ديال الرغبات والشهيوات الجنسية اللّي تقدر تدور فالراس ديال الراجل، واللّي كيكون صعيب عليه أنو يقولها للشريكة ديالو، إما بسبب الحشمة أو الخوف من ردة الفعل وتّرفض ليه منين يطلبها. ما يمكنش نعرفو كاع داكشي اللّي كيفضلوه الرجال أو كيتمناوه فالكوى، حيت كيبقى كل راجل بوحدو وكلها واش كيبغي، ولكن غادي نحاولو نهضرو على بزاف ديال الحاجات اللّي كيتشاركو فيها أغلب الرجال فداكشي اللّي كيعجبهم.

 1.التطوال فالتسخينات
بخلاف اللّي يقدرو يعتاقدوه بزاف ديال العيالات، أن المداعبة كتعاون بشكل كبير على توْقاد الشهوة عند المرا، وفترطيب التوتو والتوجاد للإيلاج، وماشي أولوية عند الراجل، راه المداعبة مهمة حتى عندو وكيبغيها تطوّل، حيت كيستمتع بيها وكتسهّل عليه يفرّش حتى هو للكوية، وكيعجبو يسخنك حتى نتي باش يسهال عليك توصلي معاه وتجيبوه بجوج.

 

2.لحكام فالفراش
الراجل غالبا ما كيكون عزيز عليه يسيطر ويحس براسو هو اللّي متحكم وقاد بشغلو. يمكن ليك تخليه يدير اللّي بغا وفق الحدود اللّي نتي دايراها مع راسك ومعاه، وعيشي اللّحظة بلا ما تحسي براسك أنك خاضعة أو مفعول بها، راه الحياة الجنسية والفراش حاجة اخرى وماشي هي الحياة اليومية.

 

3.الاهتمام والرعاية
ماشي غير العيالات اللّي عزيز عليهوم الحنان والاهتمام، حتى الراجل. واخا ما يعبرش ليك راه يمكن يكون باغيك تعنقيه، تّغزلي بيه وتبيني ليه بلّي راك مهتمة بيه وكتبغيه. هادي حاجة مهمة عند الراجل وما خصناش نهملوها.

 

4.تاخدي وقتك
من الأفكار الشائعة والمغلوطة عند بزاف، أن الراجل كيكون زربان فالكوى وكيتسنى غير فوقاش يخشيه. بالعكس الرجال حتى هوما كيبغيو ياخدو وقتهم باش يسخنو ويشعلو بالمهل. شعور زوين أنو يتسناك ويشوف فيك ونتي كتقادي ليه، ما تزربيش، بشوية عليك خودي وقتك وعطيه وقتو قبل الممارسة.

 

 5.تاخدي المبادرة
من بعد نهار كامل ديال الخدمة، يمكن الراجل يجي عيان جسديا ونفسيا، هكاك علاش بعض المرات كيبغيك نتي توريه آش يدير، هادشي كيريحو وما كيكلفوش ذهنيا. تقدري تطلعي فوق منو من خلال وضعية القايدة حيت ما كتطلبش منو مجهود كبير. وبلاصة ما يكون ديما هو اللّي كيدير المبادرة، جريه نتي لبيت النعاس، وكوني مرا وكادة ووريه علاش قادة.

 

6.مداعبة المناطق الحساسة
ما تبقايش مركزة ليه غير على الزيزي حتى تحسسيه بحال يلا ما هو غير زيزي، كاينين بزاف ديال المناطق الاخرى اللّي كتشعل الراجل وتهيجو، بحال البيضات، الفخاض، الصدر، الظهر والرقبة… كل راجل وشنو كيبغي، كيبقى ليك نتي تكتاشفي البلايص اللّي كتهيجوه.

 

 

7.اللّسانيات
كتبقى من بين أكثر الحوايج اللّي كيبغيهوم الراجل فالفراش وماشي ديما كيقدر يطلبها، هذا علاش إذا ما كانش عند المرا فيها مشكل، تحاول تّقنها وتلعب عليها لإرضاء الطرف الآخر. طلقيها وبدعي بفمك ولسانك، ونوعي الحركات والتقنيات بين اللّحس والمص.

 

 

8.تعبري ليه على شنو بغيتي
الراجل كيبغي يمتعك ويشوفك ناشطة ومستمتعة، وكيفرح فاش كتجيبيه معاه. ما كيتسناش منك ديما تقولي ليه واخا، أوكي، آه… وتبقاي تعاوديها كل مرة طلب منك شي حاجة، ولكن كيبغي يسمعك ونتي كتهضري معاه على الرغبات ديالك، أو على اللّي عجبك من الكوية وعلى اللّي ماعجبكش بزاف، حيت هادشي بالنسبة ليه مهم باش يرضيك اكثر وتّوافقو اكثر.

 

9.تلعبي ليه أو تشهيه بالجسم ديالك
أغلب الرجال كيقدرو يتحفزو ويهيجو من خلال الشوفان. الإيحائات والحركات كياخدهوم الراجل بعين الاعتبار. الراجل كيعجبو يشوفك ونتي تلعبي فالجسم ديالك، تقيسي التوتو وتلعبي بصدرك… وفنفس الوقت مانعاه أنه يقيسك، الوقت اللّي هو غير كيشوف، يسخن ويقاوم الإغراء ديالك. هادشي أيضا يمكن يبين ليه شنو عزيز عليك وشنو كتبغي، ويخليه يستافد باش يعرف شنو يختار يدير معاك.

 

10.الهمس بالزعامة يعيشو فحلامة
الهضرة بصوت خافت، بكلام حلو ومعسول أو فيه القياس ديال الضصارة، كيكون عندها وقع زوين فالوذن ديال الراجل. تقدري تقولي ليه حوايج غريبة كتظنيها تعجبك وما كرهتيش تجربيها معاه، أو أنك تختاري شي كليمات على الكوى وتقوليهم ليه فوذنيه، بحال أنك تدلعي ليه الزيزي ديالو وتعطيه سمية. يمكن هادشي يخليه يستمتع لأعلى درجة ويحس براسو بحال ويلا فحلامة.

 

11.المفاجأة
فالغالب، الراجل كيميل للحوايج غير المتوقعة واللّي مامعولش عليها، فاجئيه وجيه على غفلة بلباس مثير للشهوة، بوضعيات جداد، وفبلايص جديدة اللّي مامتوقعهاش… بعديه على الروتين وبدعي. غير هو بلا ما تعقدي الأمور بزاف، راه يمكن ليك تكوني طبيعية وكيما نتي ومغرية فنفس الوقت.

 

 

12.تنويع الأماكن
ما تخليوش الروتين يغلبكم! فاجئي راجلك بأنكم تكاواو فكاع البلايص اللّي فالدار، الصالون، الكوزينة، الدوش، فوق الطبلة، فوق كرسي ولا مكتب… وعلاش لا فأماكن اخرى من غير الدار، بحال أنكم تمشيو لشي أوطيل.

 

 

13.الفراجة فالأفلام الرومانسية
يمكن ليكوم تفرجو مرة مرة فأفلام رومانسية مع بعضياتكم، حيت هادشي كيقدر يحل الشهية على الكوى، ويعطيكوم الإلهام والأفكار الجديدة اللّي تقدرو تجربو، الشّي اللّي يمكن يخليكوم تتعرفو اكثر على الرغبات ديالكم، وتشاركوهم مع بعضياتكوم، وتزيدو بحياتكم الجنسية للقدام.

 

 

14.تشوفو راسكوم أثناء الممارسة
الشوف من بين أهم الحواس اللّي كتحفز وتثير الرغبة وتزيد منها. بزاف ديال الرجال عزيز عليهوم يشوفو راسهوم فوقيتة الكوى. يمكن ليك تحطي مراية حدا الفراش ولا فأي بلاصة غادي تكاواو فيها، اللّي يمكن ليكوم من خلالها تشوفو راسكوم شنو كتديرو وكيفاش كتديروه، وشنو تقدرو تبدلو وتطورو للأفضل.

 

 

15.الشطيح
شطحي ليه ونتي عريانة! العقد الصغيرة اللّي عندك من الجسم ديالك، ما عندها حتى شي أهمية عند الراجل، حيت هو كيعجبو أنك تقدّري الجسد ديالك وتحاولي تغريه بيه. ماكاين ما احسن بالنسبة ليه من أنك تشطحي ليه شطحة خاصة ونتي عريانة.

 

 

16.التوحويح والغوات
من بين الحوايج اللّي كيشعلو الراجل ويخليوه يعيش اللّحظة بشكل كبير، كنلقاو التنفس بعمق، والتوحويح والتناهيد، حيت هادشي كيخليه يحس براسو بلّي خدام مزيان، وداير خدمة نقية، زيد على هذا كيعبر ليه على مدى الاستمتاع ديالك معاه.

خلّي تعليق

الإيميل ديالك ما غاديش يبان للناس.