اصبر شوية...

شنو نديرو بعد الكوى

هاحنا تكاوينا .. شنو نديرو من بعد؟ كاين بزاف ما يدار قبل الكوى، سواء فالهضرة والتطياب، اللّعب والمداعبات وزيد وزيد. ولكن بعد الكوى؟ الأغلبية كيعطيوها للنعاس. النعاس مباشرة من بعد الكوى من بين الحوايج اللّي تقدر تأثر بسلبية كبيرة على العلاقة الحميمة. هو حاجة طبيعية وضرورية كيديروها الناس، الهدف منها الراحة ديال الجسم والجهاز العصبي خصوصا بعد ممارسة مجهود عضلي أو ذهني كبير. غير هو من بعد الكوى مباشرة يقدر يضيّع علينا وقيتة زوينة وبزاف ديال التفاصيل الصغيرة اللّي نقدرو نلعبو عليهم باش نزيدو فالحميمية، الانسجام والعُمق ديال العلاقة.

بزاف ديال الدراسات كتقول بلّي أغلب الرجال ما كيشوفو فالكوى غير وسيلة للمتعة والاسترخاء، بعد الكوى وملّي كيسالي المهمة، الراجل كتبان ليه أحسن حاجة يمكن يديرها هي النعاس. حيت ما كيقدرش يحس بالإثارة مباشرة من بعد الكوية، وكيخصو وقت باش يقدر يسترجع هاد الإحساس. زيد على هادشي الدماغ ديالو مبرمج أساسا على الراحة بعد الكوى، والهرمونات اللّي كيفرزها الجسم ديالو مع الأوركازم كتصعب عليه يبقى جامع راسو من بعد ما يجيب الراس.

المرا لّا، الدماغ ديالها كينشط بعد ما كتجيبو، وكيخلّيها تفكّر تدير بزاف ديال الحاجات، وتبغي تشاركها مع الراجل، حيت غرضها ماشي غير فالكوى بوحدو، غرضها فالكوى وبعد الكوى. هاد الاختلاف بين الراجل والمرا كتكون عندو عادة عواقب، واضرار على المستوى النفسي للمرا. حيت باش يدور الراجل ينعس ويخليها فحالة نشاط، كيحسسها بنوع من اللامبالاة وبحال ويلا ماشي مرغوبة، فالوقت اللّي كتبغيه يهتم بيها، يلعب معاها، يعنقها، يهضر وينشط معاها…

من غير النعاس، بعد الكوية كل واحد وشنو كيبغي يدير، على حسب الجهد والكانة، المهم ما يكونش هادشي على حساب الرغبة ديال الطرف الآخر وغير باش يحضر لشوط ثاني وصافي. مزيان نلقاو حوايج مشتركة اللّي ممكن نديروها بجوج ونخرجو بيها من المود ديال الكوى، للمود ديال المصاحبة بطريقة زوينة ومريحة.

كاينين بزاف ديال الحاجات اللّي تقدرو تديروهم مباشرة من بعد الكوية، واللّي تخليكوم تخرجو من الأجواء ديال الكوى، بحال الهضرة الزوينة، المداعبات الخفيفة، الماكلة، اللعب، النكت، وزيد وزيد، ولكن خاصكُم غير تعرفو كيفاش، ووقتاش.

التعبير والتواصل

حاولو تّواصلو بيناتكم وتعبرو لبعضياتكم على كي داز داكشي وشنو عجبكم فالكوية. تقدري تهضري مع الراجل وتجامليه على الأداء الجنسي ديالو، وتقولي ليه: كنتي واعر، عجبني داكشي…مهم يحس بلّي متعك ووصّلك لقمّة النشوة وأنو مرغوب. سوليه كيف جاتو الكوية، شنو عجبو، حتى إذا كان حشومي غادي تزعميه يعبّر، يتطلق ويقوليك شنو باغي يدير معاك، وشنو هوما اللعيبات اللّي مازال يبغي يجرّب، هادشي يمكن يهرّب ليه الكانة ديال النعاس.

داكشي غادي يكون زوين مع بوسات خفاف ونتي ناعسة ليه على صدرو، مزيان تفاداي المناطق الحساسة فالجسم ديالو فهاد الوقيتة حيت كيكونو منبلين. عطيه الحنان وغادي يعطيه ليك، حسسيه بالأمان وغادي يحسسك بيه، الراجل ماشي ديما قاسح، ومستقل كيف كيبيّن، ملّي كيكون مرتاح، مستمتع غادي يبادلك بزاف ديال المشاعر والأحاسيس.

الضحك والتكركير

تقدرو تخرجو من الجو ديال تفراح القريد بتعاويد النكت، الشّي اللّي يقدر يخلق جو زوين ورومانسي بين جوج ديال الناس عاد جابوه، ويقدر يعاونكم تحضرو لشي شوط ثاني. حيت النكت فالفراش ماشي هوما النكت فالقهوة، والنكت اللّي فيها تخصار الهضرة ونكت تحت السمطة، ماشي هي النكت العادية ديال الضحك. النكت ديال الفراش عندها نكهة خاصة، كيبقى عليكم غير تختارو الوقت بالضبط فوقاش تبداو تبسطو مع بعضياتكم، وآش من شكل منها غادي تعاودو واش نكت جنسية، ولا عادية، وشنو الهدف من النكتة، تفرّشو لشي وحيحيد آخر ولا تبدّلو الجو.

القصّ

الماكلة من أحسن الحوايج اللّي ممكن تديروها من بعد الكوية، حيث كتكونو حرقتو بزاف ديال السعرات الحرارية، والقلب كيدير مجهود باش يحافظ على الدورة الدموية فالجسم. الشّي اللّي كيفتح الشهية، خصوصا ملّي الجسم ديالكم كيبغي يعوض ديك الطاقة اللّي تحرقات فالممارسة. هكاك علاش مزيان تكوني موجدة أو يكون موجد من قبل، أو توجدو بجوج من بعد، شي حاجة تاكلوها، كتعجبكوم بجوج تكون غنية وصحية، غير هو من الأحسن ما تكونش ثقيلة وكتكهم، حيث التغلاق كيجيب النعاس!

إذا فكّرتي نتي اللّي تفطحيه، وبان ليك بلّي هاد الوقيتة ديال شي شهيوة، يمكن ليك تقتارحي عليه شي لعيبة كتعجبو، أو تنوضي تجيبيها بلا ما تقوليها ليه، يكفي أنك تحفزيه بهاني جاية مع شي ضحيكة وتخليه على نار يتسناك إيشوف شنو غادي تديري، وشنو موجدة ليه باش تفاجئيه.

لعبو!

اللعب واحد من أهم وسائل التسلية والترفيه. ماشي غير الدراري الصغار هوما اللّي كيلعبو، حتى الكبار،  اللعب فيه وفيه، كاين اللعب اللّي الهدف منو الربح، وكاين اللعب اللّي الغرض منو يعرف الواحد اكثر على  راسو ويعرف الشخص لاخر اللّي معاه. حاولو تلقاو لُعب اللّي تعجبكم وتقدرو تلعبوها بجوج، وما كتحتاجش مكان خاص، تقدرو تلعبوها فبيت النعاس، أو فأي بلاصة اخرى من الدار.

مزيان تكوني موجدة حداكم من قبل حدى الفراش أو فالماريو مستزمات الألعاب اللّي كيعجبوكوم، أو اللّي شاكة فيهوم أيعجبوه، بحال الكارطة، الإيكسبوكس، الشطرنج، أو المونوبولي … المهم شي حاجة اللّي ما تقنطوش منها وتخليكم دّوزو وقيتة زوينة.

الحاصول، راه موجوود ما يدار، المهم هو تطلقوها وتبدعو، باش تحافظو على التشويق فالعلاقة ديالكم. حيت ما خصكومش تهملو الجانب الإنساني فالعلاقة، وتربطوها غير بالكوى، الشّي اللّي غادي يأثر عليها مع الوقت ويخليها تبسال.

ديري فالبال

ماتكثريش من أي حاجة باغية منها تخليه بلا نعاس، حيت داكشي غادي يتقلب للعكس، والراجل غالبا دغيا كيمل، والروتين كيجيب النعاس. حاولي ما تلعبيش معاه مباشرة بعد الكوية غير باش طّيبيه وتسخنيه، حيت كيكون مهدود ومحتاج لشوية ديال الراحة، هذا غير أنو غايحسّك كتضغطي عليه وماشي بعيد ما يعرفش يكمل بالتوتر والضغط، وهادشي غادي يخلّي أثر خايب على النفسية ديالو، ويقدر يخلّيه يطج منك كاع فديك اللّحظة. هذا علاش مزيان تعطيه شوية ديال الوقت باش يرجّع السوفل والكانة.

ما تغفليش عليه بلا ما تعلميه، بحال أنك تمشي للدوش أو الطواليط أو الكوزينة مباشرة من بعد الكوية، حيت مع تنوضي كيحسّك خلّيتيه وكيدور ينعس، هكاك علاش ما تنوضي حتى تعلميه وماشي نيشان من بعد ما تّكاواو، حتى تكونو جمّعتو وضحكتو شوية وخلّيتي ليه فاش يتلها.

ما تهزيش البورطابل تطلّي على الفايس والإنستا، أو تشعلي التلفازة وتبقاي تقلبي فالقنوات، حيت ديك الطليلة واخا صغيرة تقدر تخلي انطباع بلّي الكوية ما كفاتكش وبلّي هربتي عوتاني لعالم الخيال وخليتيه. كل حاجة بوقتها، وهاد الوقيتة ديالكم بجوج، وحتى إذا بان ليك هو هز بورطابل ولا كيقلّب على شي ماتش، عرفي كي ترجعيه ليك، وكيفاش توصّلي ليه بلّي هادي لحظة ديالكوم بجوج ماشي غير ديالو.

كاين اللّي ما كيعرف ما يقول بعد الكوى، كيتخلطو ليه العرارم وكيبدا يعبّر فالشرق والغرب: شفت صباط عجبني ومازال ما داز الصالير. مزيان الواحد يتفادى دوك المواضيع اللّي فيها المشاكيل والتعنكوشات، وداكشي اللّي يقدر يخربق الكانة، ويخرجكم من حالة الاسترخاء وراحة البال. وحتى التنقاز بين المواضيع كيعطي انطباع بأن الواحد ما مرتاحش، بالو مشطون وما مدوزش وقيتة زوينة.

ما تزربيش تلبسي حوايجك نيشان من بعد ما تساليو، خلّي شوية ديال الوقت وإذا جاك البرد تغطاي.  حتى إذا لبستي قولي ليه علاش، حيت باش تلبسي دغيا ومباشرة بعد الكوية، تقدر تبان ليه بحال إلا ما راس ما حتى لعبة، وكنتي باغية غير فوقاش تفكّي.

خلّي تعليق

الإيميل ديالك ما غاديش يبان للناس.