اصبر شوية...

الصحة

سرطان الثدي: كيفاش ندير فحص ذاتي للثدي

سرطان الثدي أو المرض الخايب كيف كيتقال ليه، هو مرض خبيث نيت، والسبب الرئيسي لموت بزاف ديال العيالات. هكاك علاش التشخيص ديال هاد المرض فأقرب وقت مهم، حيت كيقدر يعطي فرصة كبيرة للعلاج والشفاء منو بمرّة.

من غير الفحوصات اللّي كتدار فالعيادة، الأطباء كينصحو ويشجعو العيالات يديرو الفحص الذاتي لبزازلهم باستمرار. هاد الفحص مهم بزاف، حيت كيعاونك تعرفي على بكري إلا عندك شي حاجة ماشي هي هاديك فبزازك، واللّي تقدر تكون سرطان الثدي.

كل ما حسيتي بالنفوخية أو شفتي شي تغيير فالشكل أو اللون ديال البزولة، كل ما كان احتمال يكون سرطان الثدي. زيد على هذا طبعا النتائج ديال الفحص السنوي اللّي كيوصيو به أطباء النساء، والتصوير الشعاعي للثدي اللّي خاص يدار مرة كل عامين بالنسبة للعيالات بين 50 و 74 عام حيت كيكونو معرضات اكثر للإصابة بهاد المرض.

الأخصائيين كيوصويو المرا تدير لراسها فحص ذاتي للثدي بانتظام من سن 25 عام للفوق، مرة كل شهر. ومن الأحسن بعد الدورة الشهرية بيامات قليلة حيت الأنسجة ديال الصدر كتكون رطبة فهاد الوقيتة، وغادي يسهال عليك تعرفي واش الأمور عادية أو كاينة شي حاجة ماشي هي هاديك.

الفحص اليدوي للبزولة كيعاون على الكشف المبكر لسرطان الثدي.

علاش هاد الفحص؟

الهدف من الفحص الذاتي ديال البزولة هو تقلبي ياك ما تبان ليك حاجة غريبة وماشي طبيعية، أو شي تغيير فالصدر. حيت التعرف على هاد النوع من العلامات على بكري كيخليك تعرفي شنو عندك وشنو خاص دّيري على تيساع، وحتى العلاج غالبا كيكون سهل إذا عرفتي آش عندك من البدايات ديال المرض، وبالخصوص فالحالة ديال سرطان الثدي.

باش تحددي العلامات المبكرة لسرطان الثدي، يمكن تديري الفحص الذاتي للثدي بسهولة غير فالدار ببعض التقنيات والطرق، وتشخصي هاد المرض فأقرب وقت ممكن.

الخطوة اللولة : الفحص البصري .. بمعنى غير بالشوفة والمنظر ديال البزولة

غادي تقابلي مع المراية، تديري هاد الحركات وحدة بوحدة وتردي البال ياك ما تبان ليك شي حاجة ما هياش فبزازلك :

  • يديك يكونو مطلوقين وكتافك عاديين
  • يديك شادة بيهم النص ديالك
  • يديك طالعين ودايرهم ورا راسك
  • عطي للمراية بالجنب

حاولي تلاحظي فكل وضعية :

  • شي تغيير فالحجم ولا الشكل ديال البزولة
  • شي حاجة مبدلة فالجلد أو راس البزولة
  • النفيخ
  • واش كطلق البزولة شي سائل، سواء عصرتيها أو لا

الخطوة الثانية : اللّمس

خاصك تأكدي من الفحص ديال البزولات بجوج، وحتى لداخل ديال بيطانك. قيسي بصبعان يديك ليمنية بزولتك ليسرية، والعكس مع البزولة ليمنية فحصيها بيدك ليسرية. كل وحدة فحصيها بثلاثة ديال المستويات: بشوية، شوية بالجهد، وبالجهد. ويمكن ليك تديري هادشي بثلاثة ديال الطرق : شعاعية، دائرية ولا عمودية.

  • الطريقة الشعاعية: كتجمعي صبعان يديك بخمسة على الراس ديال البزولة، وكتبقاي تحليهوم بحال الوردة على البزولة. عاوديها حتى تدوزي على كاع البزولة ديالك، عاد دوزي للاخرى.
  • الطريقة العمودية: بداي من الفوق جيهة الباط، هبطي بيدك مبسوطة من الفوق للتحت بحال إلا كتحكي بكيس الحمام، الحركات العمودية اللّي غادي تبقاي دّيري من الجنب لوسط الصدر، خاصها تكون مقاربة لبعضها باش ما تزكلي حتى شي بلاصة.
  • الطريقة الدائرية: من الفوق عند الباط، كتبداي بحركات دائرية على البزولة كاملة بحال الا كتفركي، وتبداي تصغري الدائرة شوية بشوية حتى توصلي للراس ديال البزولة، وسالي بيها.

علاش كتقلبي من هاد الفحص؟ شنو يقدر يبان ليك؟

  • التغيير فالشكل أو الحجم ديال وحدة من بزازلك
  • ولسيسة ولا كرة باينة
  • التكماش ديال جلد البزولة أو الحلمة
  • الغلاضة ديال الجلد
  • الحمورية أو العروق واضحين
  • سائل كيخرج من راس البزولة
  • أي حاجة جديدة وغريبة فالمظهر ديال الذات

 

شنو تديري إلا لقيتي شي حاجة من هادشي؟

ما تشوشيش بزاف وتزيدي فيه، راه يمكن ما يكون عندك والو، وحتى إذا كان راه ضروري كاين حل. ولكن أهم حاجة هي أنك تدوزي عند الطبيب ديالك وما تعطليش، هو اللّي يقدر يدير ليك فحوصات أكثر دقة ويقولك بالضبط شنو عندك.

ديري فبالك أن الفحص الذاتي للثدي واخا مهم وضروري يتدار بانتظام راه كيبقى ما كافيش، وما كيغنيش على الفحوصات الأساسية ديال الأخصائيين، حيت كيكشف لينا غير المشاكل الباينة والواضحة أو التغيرات اللّي تقدر تطرا على الصدر. فالوقت اللّي يمكن لمرض سرطان الثدي أنو يتطور مع الوقت بلا ما يدير حتى شي أعراض، وهذا علاش الفحص السنوي مهم وبزاف.

خلّي تعليق

الإيميل ديالك ما غاديش يبان للناس.