اصبر شوية...

الرياضة

تمارين كيغل لتقوية قاع الحوض

قاع الحوض هو مجموعة ديال العضلات والأنسجة كتكون مربوطة بحال شي طياشة ما بين عظم-طو، آخر عظمة فالسنسول من اللور، وعظم العانة اللّي كيكون فوق الحجر من القدام. هاد العضلات هي اللّي كتكالي الأمعاء وكتهز النبولة والوالدة، وهي اللّي كتخليك تتحكمي فالمصارن والبولة. ملي ما كيكونوش مخدومين الأعضاء الداخلية ما كتبقاش محكومة مزيان، ومع الوقت كيصعاب على الواحد يتحكم فالبولة والرّيح وداكشي …

عضلات قاع الحوض مهمين حتى للممارسة الجنسية، حيت التحكم فهاد العضلات كيخليك تحكمي فالضيق ديال التوتو، الشّي اللّي كيعني متعة اكثر وراس زوين فالفراش، هذا غير أنهم كيجمعو الفريخ وما كيخليوهش يترخف ويتخنشش مع الوقت.

علاش مزيان تخدمي عضلات قاع الحوض

مزيان لمرا تخدم العضلات ديال قاع الحوض مرة مرة وتخليهم محركين. حيت كيترخفو مع الوقت والكبر فالسن، وبالزيادة فالوزن، وهزان الثقل أو الحمل والولادة. تمارين قاع الحوض مزيانين حتى مع الحبالة حيت كتعاون الجسم ديال المرا يولّف الوزن ديال الجنين، وكيسهل على الكرش تّجمع من بعد الولادة. هذا غير أنها مزيانة لحالات التبول اللاّ إرادي اللّي كتجي لبعض العيالات فالفترة ديال الحمل.

كيفاش كيتخدمو

كاينة تمارين كيجل اللّي كتدار خصيصا باش تقوي عضلات قاع الحوض. باش تديريهم خاصك بعدا تعرفي العضلة اللّي غادي تخدمي وتعزليها مزيان. حاولي تجلسي وترخي العضلات ديال الكرش والمؤخرة. زيّري على دوك العضلات اللّي كتحبسي بيهم البولة والرّيح بالعادة ملي كتكوني محصورة، وطلقيهم عوتاني. عاودي التجربة حتى تحدديي بالضبط العضلة اللّي كتحبسي بيها البولة. خاص الإحساس بتزيار يتحس مابين المؤخرة والتوتو.

حتى تعرفي العضلات علاش ضاير الفيلم، عاد بداي التمرين. غادي تبداي تزيّري عليهم، حتي تحسيهم بحال إلى كيطلعو لفوق، تحسبي لثلاثة، وتطليقهم عوتاني، وتعاودي العملية 10 حتى 12 مرة فكل تمرين، وديري جوج حتى لـ3 ديال التمارين فالنهار. تقدري تدري التمرين جالسة أو متكية أو واقفة، غير هو حاولي تنفسي مزيان وما تعصبيش شي عضلة أخرى، بحال الكرش المؤخرة والرجلين ونتي كتديريه، التازمي بيه وعطيه شوية ديال الوقت والخاطر باش تبان نتيجة.

خلّي تعليق

الإيميل ديالك ما غاديش يبان للناس.