اصبر شوية...

المرة اللّولة: 12 نصيحة للمبتدئين

1.تكاواي فاش تكوني مستعدة
الكوية اللّولة غالبا ما كيكون فيها ضغط كبير ناتج على تداخل العديد من المشاعر، بحال الخوف، التوتر، والرغبة… اللّي كيقدرو يأثرو إما إيجابيا ولا سلبيا على الكوية، هذا علاش من الأفضل أنك ما تاخدي هاد الخطوة حتى تكوني موجدة ليها مزيان، وتكون عندك الكانة، وباغية لا على المستوى النفسي ولا على المستوى الجسدي. ما ضغطيش على راسك غير باش ترضي الطرف الآخر، حيت المهم هنا هو نتي. هذا علاش خودي راحتك وديري فاش ترتاحي، ترخاي وتطلقي وحاولي تعيشي اللّحظة.

2.راحة البلاصة
المكان الأفضل فاش يمكن يتكاوا فيه الواحد أول مرة، يمكن يختلف من شخص لآخر. غير هو الاختصاصيين كينصحو بالبلاصة اللّي كتحسس بالأمان والراحة النفسية، حيت هادي حاجة غادي تديريها لأول مرة، وتقدر ترسّخ ليك فالذاكرة وتبقاي تّفكريها، وعلى قدر المستطاع مزيان ما أمكن أنك تّكاواي المرة اللّولة فمكان مايخليكش تّوتري، ولا اللّي يقدر يأثر سلبيا على ليلتك!


3.اختارو وضعية جنسية ساهلة
الوضعية اللّي غادي تديرو أول مرة غالبا ما كتعتمد على التجربة ديال الشريك، ولكن من الأحسن فاللول أنكم تبداو بـ وضعية الفقيه  حيت ساهلة ومريحة ليك، يكون الراجل فوق منك ونتي ناعسة على ظهرك وحالة رجليك. هاد الوضعية كتخليكوم تشوفو فبعضياتكوم، وتتواصلو بشكل أفضل، وفنفس الوقت كتقدر تعطيك تحكم نسبي فالوضع، توقفيه إذا تقسحتي، أو تجريه لعندك إذا بغيتيه يزيد.


4.ما تزيديش فيه وتبغي تديري كولشي
المرة اللّولة هي لحظة للإكتشاف والتعلم، وماشي فرصة لأنك تجتاهدي وتحاولي دّيري كاع داكشي اللّي سامعة بيه أو شايفاه فالبورنو، حيت هذا ماشي وقت استعراض المهارات ولكن وقت الممارسة. باش تّعلمي مزيان، احسن أنك تمشي دقة دقة وبالمهل، عوض ما تجربي شي حاجة اللّي نتي ما حكماهاش وتعرضي راسك أو الطرف الآخر لشي موقف محرج نتي في غنى عنه. هادي الكوية اللّولة، عطيها وقتها وحقها وديريها بالتاويل والتباتة.

5.عادي إذا ما جبتيهش المرة الأولى
صعيب بزاف أنكم تجيبوه بجوج المرة اللّولة، وصعيب اكثر أنكم تجيبوه دقة وحدة، حيت كيكونو بزاف ديال العوامل اللّي كتأثر على الكوية: عوامل نفسية بحال التوتر والخوف… وجسدية مرتبطة بمدى استعداد التوتو، والآلام المصاحبة لعملية الإيلاج والوقيتة فاش غادي يدخل فيك الزيزي ديالو. خودي المرة اللّولة كتجربة وحاولي تستافدي منها ما أمكن، وما يبقاش فيك الحال وتحسي بالإحباط إلا ما جبتيهش، راه عادي أنك ما تجيبيش راسك فأول كوية، وديري فبالك بلّي راك مازال كتعلّمي، وآرا ما تجيبيه من بعد.

6.ركزي على التسخينات
المُداعبة الجنسية هي المرحلة اللّي كتكون قبل الكوى، مزيان أنك تعطيها وقتها وما تهمليهاش. خاصك على الأقل الحد الأدنى من اللّعب والمداعبة اللّي يقدر يفزك ليك التوتو ويوجدو، حيت إذا كان ناشف غادي يضرك اكثر.

 


7.التواصل : مع الطرف الآخر، وبينك وبين راسك
التواصل مع الطرف الآخر حاجة مهمة واخا ما ساهلاش فهاد السياق. مزيان أنك تخممي وتجاوبي مع راسك على: كيفاش بغيتي هادشي يدوز؟، وأي حاجة بغيتي تقوليها ليه مزيان تفكري فيها على بال “ماشي غير جيب أفم وقول”، هكا تقدري تأمني راسك وتريحيه نفسيا اكثر. شحال ما هضرتو مزيان، شحال ما احسن، حيت هادشي كيضوي ليكوم الطريق، وكيجنبكوم الدهشة ديال المفاجآت.


8.تقولي أنا عزبة
!
ماشي ضروري ضروري أنك تقولي ليه بلّي نتي مازالة بنت، ولكن من الأفضل والمنصوح بيه أنك توصلي ليه أو تشاركي معاه هاد المعلومة، باش يدير بحسابها ويحاول عليك، وعلاش لا؟ يعلمك ويوريك، هذا طبعا إذا كان ناضج وعندو ثقافة جنسية، أما فحالة كانت هادي المرة اللّولة ليكوم بجوج فمزيان تحاولو تكتاشفو الكوى غير بالمهل وشوية بشوية.

 

9.منع الحمل
فحالة ما كنتوش باغيين يوقع حمل فالمرة الأولى، كاينين بزاف ديال الوسائل باش يمكن ليكوم تّجنبوه، بحال الواقي الذكري، حبوب منع الحمل، العزل (يجيبو برا وماشي وسط منك)… غير هو نِسَب الأمان ديالهوم كتفاوت وكيبقاو كلهم ماشي مضمونين 100%.
* إلا شكيتو من بعد الممارسة أنه يمكن يوقع حمل، مزيان تستاشري صيدلاني على حالتك فأقرب وقت، أو تشوفي أخصائي اللّي يقدر يشوف شنو عندك أو يوجهك شنو تديري.

10.تكوني محسنة
حاجة مهمة أنك تكوني زوينة (ضايرة براسك وعاطية للعين)، نقية ومحسنة المناطق الحساسة، تقدري تمشي للصالون وتحيدي الشعر الزايد اللّي كيعطي ريحة ومنظر خايبين، ولا تحسني لراسك ومن الأفضل غير بالمقص أولا كاع لاسير. المهم أنك تكوني نقية وفريشك، وحاسة براسك خفيفة ومزيانة.

 

11.تكملي حتى للآخر
ماشي لابدا تضغطي على راسك باش تكملي ولا باش تجيبيه، إذ عيتي أو حسيتي بيه كيضرك وما قدراش تكملي، يمكن ليك تحبسي وترتاحي شوية وتكملي، أو توقفي فمرة، المهم حاولي تاخدي فكرة على الحدود ديالك ولاش باغية توصلي. عطي لراسك فرصة تعلمي وستافدي مزيان من اللّي درتي، وما تلوميش راسك أنك ما وصلتيش للنشوة أو أنك ما كملتيش مع الطرف الآخر الطرح.


12.تعرّفي على الجسم ديالك
باش تكوني مزيانة مع راسك، حاولي تعرّفي مزيان على الجسم ديالك فاللّقاء الجنسي الأول. ما تخافيش من أنك تّقاسي، حاولي تّحسسي كل ملامسة وتردي البال مع كل نقطة من الجسم ديالك وكيفاش كتفاعل أثناء الممارسة. بهادشي يمكن أنك تكتاشفي الجسد ديالك وتعرّفي عليه اكثر، وتعرفي البلايص اللّي كتثيرك وتهيجك وتحسسك بالراحة والمتعة فالعلاقة.

خلّي تعليق

الإيميل ديالك ما غاديش يبان للناس.