اصبر شوية...

الصحة

الكوى والتهاب المسالك البولية

هي وحدة من الأمراض المنتشرة بشكل كبير عند العيالات، وهي عدوى بكتيرية  فالمسالك البولية كتكون غالبا فالنبولة. فيها اللّي كيجي وكيمشي، والمزمن اللّي كيبقى طول العمر، 40 حتى لـ 60 فالمية من العيالات كتجيهم هاد الحالة مرّة على الأقل فحياتهم، والربع ديال العيالات كتبقى تّعاود عندهم تجيهوم اكثر من مرّة.

هاد الالتهاب كيجي للعيالات اكثر من اللّي كيجي للرجال، حيت العيالات عندهم المجرى ديال البول قصير، وهادشي اللّي كيسهل على البكتيريا المستقيمية بحال الإشريكية القولونية تتسبب فالعدوى.

واش الكوى يمكن يزيد من الإلتهاب؟

إذا كنتي كتكاواي ونتي مريضة بعدوى المسالك البولية، يمكن هادشي يخلّي الأمور تولي اكفس ويتزاد عليك الحال، حيت كتقدر تعاود تنشر البكتيريا اللّي كانت السبب فالعدوى من اللّول.

 واش يمكن تنتقل العدوى للشريك؟

محال، مرض التهاب المسالك البولية ما كيعاديش، واخا هكاك بزاف ديال الأبحاث كتقول بلّي فاللّول غالبا تشخيص الأمراض المنقولة جنسيا، كيتشخص على أنو عدوى الجهاز البولي، حيت الأعراض كتقدر تكون بحال بحال. هادشي كيخلّي الشخص يسحابليه أنو دوز المرض للطرف الآخر، الوقت اللّي يقدر يكون دوّز ليه مرضة أخرى بحال الكلاميديا ولا السيلان.

فوقاش نقدر نرجع للكوى؟

أول حاجة هي العلاج. الطبيبة ديالك تقدر تطلب منك دّيري تحاليل ديال البولة ولا حتى ديال الدم باش تعرف واش عندك عدوى الجهاز البولي، وعلى حسب هاد التحاليل تقدر تعطيك الدوا، اللّي كيكون غالبا شي مضاد حيوي. من بعد ما تسالي الدوا ديالك كامل وما تبقاي تحسي بحتى حاجة، ديك الساعة يمكن تكون الممارسة الجنسية آمنة، وهادشي بالعادة كيقدر ياخد أسبوع تقريبا فالحالات العادية.

إذا ساليتي الدوا وواخا هكاك مازال الحريق، ولا شي أعراض فالممارسة، هادشي كيعني بلّي راه مازال الميكروب كاين. فهاد الحالة نساي عليك الكوى حتى تشوفي مع الطبيبة ديالك.

كاينين بزاف ديال الأعراض اللّي تقدر تبين ليك واش عندك التهاب المسالك البولية بحال :

  • كيصعاب عليك تبولي
  • كتجيك البولة بزاف
  • حريق البول
  • الحريق تحت الكرش
  • كيخرج ليك البول مخلط مع الدم
  • كتحسي بالتبوريشة وفيك السخانة

إذا كانت عندك وحدة من هاد الأعراض، غالبا غادي تكوني مريضة وعندك التهاب فالنبولة. ما تخلعيش، هادا مرض دالع وماشي شي حاجة خطيرة. غادي نقترحو عليك شي حوايج اللّي تقدر تعاون فالعلاج -طبعا من بعد ما تكوني شفتي الطبيبة- واللّي كينصحو بيها الأطباء الاختصاصين فالمسالك البولية:

  • شربي الما بزاف، هادي من أهم الحوايج اللّي خاصك تديريها حيت هادشي كيعاونك تبولي اكثر وتخرجي الميكروب من الجسم ديالك.
  • تفاداي أي حاجة حامضة، حيت كتنشف وتهيج الجسم، وكتقدر تضر وتحرق فحالة التهاب المسالك البولية.
  • من بعد الكوى نيشان، مزيان تمشي للطواليط وتبولي، حيت كتخوي المثانة وكتخرجي الميكروب على برا، وحاولي تمسحي من القدام للور بحال إلا كتخرجي وماشي العكس.

إذا كانو المضادات الحيوية دقة بطلة، ولكن بغيتي تعاوني بوصفات طبيعية، ديري الما بالزعتر. فاش تغلّي الما طفي عليه وديري فيه الزعتر لمدة خمس الدقايق، صفيه وخليه يبرد. وبقاي تشربيه مرة مرة على طول النهار.

خلّي تعليق

الإيميل ديالك ما غاديش يبان للناس.