اصبر شوية...

الأوركازم

الأوركازم، الراس، البليزير هو منتهى الإثارة الجنسية، هو إحساس عام وقوي باللّذة والنشوة عبر تفريغ الشهوة الجنسية. الأوركازم عادي عند الإنسان بغض النظر عن الجنس، سواء كان مرا أو راجل. علميا كاينين 4 أنواع ديال الأوركازم اللّي متعارف عليها: ديال الكوى، ديال المداعبات، ديال التكفات، وديال الاستحلام. وهو من المواضيع اللّي ما خداتش حقّها من الدراسة حتى فالدول الغربية، بحال مثلا فالمسألة ديال : واش عادي ولا ماشي عادي المرا ما تجيبوش فالفراش، اللّي مازال فيها نقاش حتى لدابا.

الاوركازم تعرّف بطرق مختلفة حسب الزاوية اللّي تعالج منها الموضوع. الأطباء عرّفوه من خلال التغييرات اللّي كتوقع للجسم ديال الإنسان وهو كيجيبو، بالمقابل المتخصصين فالصحة العقلية شافوه فالتحولات النفسية والحسية اللّي كتوقع للإنسان فهاد اللّحظة. شي تعريف ولّا شي تفسير شامل للأوركازم مازال ما كاينش.

المتخصصين حاولو يفهمو الأوركازم من خلال المراحل ديال الإثارة الجنسية. وخا الأوركازم كيختلف من شخص لشخص، نقدرو نقولو بلّي كاينة تحولات عضوية عامة كتوقع للناس كاملين. كاين اللّي قسّم مراحل الأوركازم لـ 4 ديال المراحل: الإثارة، الركود، الأوركازم، والإنفراج. وكاين اللّي بدا بالرغبة، الإثارة والأوركازم.

المنافع الصحية:

فـ 1997 دراسات لقات بلّي خطر الوفاة عند الرجال اللّي كيجيبوه فالشهر بزاف، أقل من هادوك اللّي كيجيبوه قل. دراسة جديدة فـ 2015 لقات باللّي القذف المنتظم كيقلل من احتمال الإصابة بسرطان البورسطاط. الناس جمعو معلومات على 32 ألف راجل فـ 18 سنة، ولقاو بلّي خطر الإصابة بسرطان البروسطاط كيقلال بنسبة 20 فالمية بالنسبة للرجال اللّي كانو كيجيبوه 21 مرة على الأقل فالشهر، مقارنة بلّي كانو كيجيبوه غير 4 حتى لـ 7 ديال المرات فالشهر.

كاينين بزاف ديال الهرمونات اللّي كيفرزهم الجسم ديال الإنسان فالأوركازم، أهمهم الأوكسينوسين وDHEA، وكاينة دراسات اللّي لقات بلّي هاد الهرمونات كتقاوم أمراض السرطان وأمراض القلب، هذا غير أن الأوكستوسين كيتعتابر من المهدئات الطبيعية.

أنواع الأوركازم

كاينين أنواع كثيرة ديال الأوركازم، وهادشي راجع لأنه ما عندوش تعريف محدد، كاين الأوركازم المخلّط، اللّي فيه اكثر من أوركازم باختلاف نوعية الإثارة. كاين الأوركازم المتعدد، وهو فاش كيكون التسلسل ديال الرعشات فوقت قصير بلاصة رعشة وحدة. الأوركازم عبر الضغط، وهاد النوع كيجي من الضغط على المناطق الحساسة وغالبا كيكون فالدراري الصغار. وكاين أوركازم الاسترخاء، كيجي من إثارة الأعضاء الحساسة فاش كيكون الجسم مرخي، بحال فالماساج. وكاين اللّي زاد حتى الأوركازم اللّي كيجي من الأحلام أو الخيال، والأوركازم ديال الجي سبوت، وهي واحد البلاصة فالتوتو ديال المرا، الإثارة ديالها كتعطي راس مختلف وفشكل، ولكن خاص اللّي يعرف ليه.


الأوركازم ديالو:

أول مرحلة هي الإثارة، واللّي كتجيب معاها عدد من التغييرات النفسية والجسدية، أولها أنو كيقيم. حيت ضغط الدم كيتزاد فالعروق ديال الزيزي، الشّي اللّي كيخليه يزيد فالحجم ويقصاح. البيضات كيطلعو للفوق، جيهة الكرش حيت الجلدة اللّي جامعاهم (كيس الصفن) كتّجمع، من بعد كتجي مرحلة الإثارة ملّي العروق اللّي ضايرين بالزيزي كيعمرو بالدم هوما والراس ديالو وكيكبّروه فالحجم، العضلات ديال الترمة كيتجمعو، السرعة ديال دقات القلب والتنفس كتزاد. ومن بعد كيجيب الراس، أو ما يعرف بالقذف، المني كيتدفع لبرا بسبب الضغط المسمتر من العضلات اللّي تحت الزيزي، بالعربية عضلات “قاع الحوض“، البروسطاط والغدة المنوية اللّي كيبداو ينفضو ويدفعو المني ديال الراجل بالجهد باش يخرج. الأوركازم ديال الراجل كيستمر ما بين 10 حتى لـ 30 ثانية.

الراجل كيدخل من بعد فواحد المرحلة ديال الراحة والتعافي، اللّي ما يقدرش يجيب فيها شي راس آخر. والمدة ديالها كتختالف من راجل لراجل، على حسب السن، والصحة، والنفسية. كاين اللّي كتاخد ليه دقايق وكاين اللّي تاخد ليه اكثر. فهاد المرحلة كيرجع الزيزي والبيضات ديال الراجل للحجم الطبيعي ديالهوم، والسرعة ديال دقات القلب والتنفس كيوليو عاديين.

الاوركازم ديالك:

من بعد الإثارة الجنسية الجسم ديالك غادي يعرف بعض التغييرات، ضغط الدم فالعروق اللّي ضايرين بالمسائل غادي يخليهم يتنفخو. الرحم غايفزك، والتوتو غادي يوساع من لداخل. غادي تّزاد سرعة دقات القلب والضغط ديال الدم، الشّي اللّي يخلي الجلدة ديالك بحال إلى كتلمع، خصوصا فالرقبة والصدر. من بعد كتجي مرحلة الإثارة، وهي ملّي كيوصل التدفق ديال الدم فالحجر للحد ديالو، التوتو كيتنفخ، الحجم ديال البزازل كيكبر حتى هو بواحد النسبة اللّي تقدر توصل حتى لـ 25 فالمية، والهالة، داك الجلد اللّي كيكون ضاير بالراس ديال البزول كيتنفخ. من بعد ما كتوصلي لقمة الإثارة، التوتو، الفتحة والوالدة، كيبداو يزدحو بمعدل زدحة فكل 0.8 ثانية فاش كتكوني كتجيبي راسك، وإحساس ممتع باللّذة وقمة النشوة اللّي كيدوم ما بين 13 و 51 ثانية. بخلاف الراجل، المرا غالبا ما كتحتاجش فترة تعافي وراحة من بعد ما كتجيب الراس، تقدر تجيب ريوس اخرين مباشرة من بعد إذا بغات، ولقات الراجل اللّي فيه الجهد. من بعد الراس، الجسم كيرجع لحالتو الطبيعية، ضغط الدم ودقات القلب كيرجعو للمعدل الطبيعي ديالهوم، والنفيخ كيزول.

علاش؟

الأوركازم كيجي من الإثارة المستمرة للأعضاء الحساسة: الكليتوريس، الراس ديال الزيزي، البزازل، الترمة. سواء بالمداعبات، الكوى، الجنس الفموي، ولا التكفات. هذا من الناحية الفيزيولوجية. ومن الناحية الطبية، الأوركازم كيجي من جوج ردود فعل كيديرهم الجسم ملّي كتّم إثارة المناطق الحساسة فيه: زيادة ضخ الدم فالعروق، والتشنجات والنفيض ديال العضلات، فالكوى. غير هو فـ 2011 لقاو بلّي كاين سبب للأوركازم اللّي ما عندوش علاقة بالكوى، الرياضة: خاصة حمل الأثقال وتسلق الجبال اللّي تقدر تخلي المرا تجيبو واخا بلا إثارة جنسية.  كاينين شي تقارير اللّي هضرات على أوركازم كيحسّوه مرضى الصرع فبعض الأزمات، وكاين من الناس اللّي كيقطعو ليهم رجلهم لسبب أو للآخر، ويحسو بالأوركازم فالجهة اللّي مقطعة، والناس اللّي كيعانيو من الشلل النصفي كيجيوه تاهوما. هادشي اللّي مخلي شي بعضين يقولو بلّي الجهاز العصبي ديال الإنسان هو المسؤول على الأوركازم، وماشي الأعضاء التناسلية.

المشاكل ديال الأوركازم

الأوركازم فيه مشاكيل، تقدر بعض المرات تجيب الضغط والاكتئاب وإحساس خايب بالنقص، لا بالنسبة للراجل ولا المرا، كيف كيف. بالنسبة للراجل كاين مشكل الاضطراب ديال الأوركازم، بمعنى الراجل ما كيجيبوش كامل، كيجيبو مقطع، ولا ما كيجيبوش كاع. وهاد القضية تقدر تكون دائمة أو يقدر الواحد يكون عادي حتى تجيه. الأسباب ديالها تقدر تكون مرتبطة بالصحة، بحال أمراض القلب أو النفسية بحال القلق والضغط ديال الخدمة، أو بسباب الماكلة ديال المهدئات.

المشكل الثاني هو القذف السريع، مشكل شائع ومعروف، كيوقع فأحسن العائلات. الراجل ما كيجي يدخلو فالتوتو حتى كيجيبو ما كاملاش دقيقة. الأسباب ديال المشكل فيها النفسي والصحي، بحال الخلل فالهرمونات، والمشاكل ديال الأعصاب.

بالنسبة للمرأة، كاين الاضطراب ديال الأوركازم، المرا ما كتجيبوش كامل، ما كتشبعش، أولا ما كتجيبوش كاع. وهاد القضية تقدر تكون من ديما، وتقدر تكون عرضية، أي أن المرا تكون كتجيبو عادي وتبدا تلقى صعوبة باش تجيبو، حتى ما تبقاش تجيبو فمرة. الأسباب ديال هادشي تقدر تكون عندها علاقة بأمراض أو بسبب الماكلة ديال شي دوايات، القلق والضغط، والاكتئاب.

ديري فالبال

المجتمع كيشوف فالأوركازم الغاية من الكوى، اللّي تكوات وما جابتوش راه ما دارت والو. وهادي مسألة فيها نقاش. 10 حتى لـ 15 فالمية ديال النسا ما عمرهم جابوه. دراسات أكدات بلّي ما يمكنش يتّعتابر الأوركازم أهم حاجة فالكوى، بزاف ديال النسا كيتكواو وكيلقاو النشوة ديالهم فرابط العلاقة وسعادة الارتباط بشخص آخر اكثر من الإثارة الجنسية.

زيد عليها أن الإيلاج ماشي ضروري يجيب الأوركازم، 25 فالمية فقط من النسا كيجيبوه بالدّيه وجيبو، النّص مرة مرة، 20 فالمية نادرا، و5 فالمية ما كينغمهمش الدّيه ويجيبو فالتوتو فمرة. هذا علاش ماشي ضروري يدخلو باش تجيبيه، والكوى بحال ديال البورنو ما كيعنيش بالضرورة أوركازم، الأوركازم تجربة شخصية كتختالف فاللّذة والنشوة ديالها من مرا لمرا. هاكا علاش مزيان الواحد ما يحاولش يقارن راسو بلوخرين، حيت الأوركازم ديالهم ماشي هو ديالك.

المقال الغادي
المقال الجاي

خلّي تعليق

الإيميل ديالك ما غاديش يبان للناس.