اصبر شوية...

موضة

أنواع لانجري وكيفاش تختاري فيهم اللّي يواتيك

كاينة بعض الحاجات اللّي كنستعملوها، يمكن يوميا، كتجينا زوينة وكتعجبنا، ولكن واش كنعرفو شنو هي، ونفرقو بيناتها ونعرفو الأنواع ديالها؟ ماشي ديما. لانجري واحد من هاد الحاجات. ماشي كاع العيالات كيعرفو فلانجري، يقدرو يفرقو بيناتهم ويختارو اللّي يواتيهم. كاينة اللّي مازال كتلقى صعوبة تفرق بين لانجري والملابس الداخلية.

لانجري ملابس داخلية، ولكن الملابس الداخلية ماشي ديما لانجري. ما معمولش غير على قبل الإحساس بالراحة والنعومة، معمول حتى باش يزين الفصالة ديال المرا ويحسسها بالأنوثة ديالها. ما كتشريهش المرا غير باش تبان للراجل زوينة أوعلى قبل الكوى، تقدر تشريه غير باش تحس بالفرق وتهلا فراسها.

الرجال ما كيعجبهمش لانجري غير حيت شيك أو الستيل ديالو زوين، كاين فيهم اللّي ما غاديش يفهم أصلا علاش المرا تخسر 400 درهم على سوتيامات وسليب غادي يطيرو مع جوج بوسات اللّولين. ولكن واخا هاكاك كيحسو بالرمزية ديالهم، وبأنهم ملبوسين على قبلهم، وأنك عطيتي اهتمام خاص واستثمرتي فلوس على قبل هاد السويعة الزوينة.

أنواع لانجري والفرق بيناتهم

لانجري أنواع وأشكال، كيختلف على حسب الموديل والفصالة وبعض المرات حتى باش مصايب. فيهم بزاف لدرجة أن Camisole مع كيلوط V شيك يقدر يولي لانجري ويجي زوين. حنا هنا غادي نركزو على الأنواع ديال لانجري الأساسية اللّي خاصك ضروري تعرفيها وتميزي بيناتها باش يسهال عليك تلقاي اللّي يواتيك وما تحيريش.

الـ Nuisette

بغض النظر على واش مزوجة ولا ما مزوجاش، إذا كنتي من النوع اللّي كيتهلا فراسو وكيعجبك تنعسي مرتاحة، خودي ليك Nuisette. كاين اللّي كيسميها Robe de nuit  أو Babydoll. دايرة بحال الروب ديال الخروج غير هو الثوب ديالها خفيف ورطب وبعض المرات شفاف، قصيرة حد الفخاض، كتكون بالكمام أو نازلة على الكتاف غير بخويطات. فيهم اللّي كيجمعو الصدر وفيهم العادي. فيهم بزاف ديال الفصالات والأشكال، قصيرة بزاف أو حد الفخاض، شفافة أو عادية، مزوقة أو حسبية، بالظهر أو بلا ظهر. على حسب الذوق ديالك، غير هو ضروري تكون عندك شي وحيدة ولا جوج، إذا ما كانتش للكوى، تكون للراحة والنعاس.

 

الـ Déshabillé

من الأساسيات وما عمرها تخطاك. إذا عولتي تاخدي لانجري وحرتي ما عرفتي شنو تاخدي، أو كنتي من النوع الحشومي اللّي ما كيزعمش، خودي Déshabillé، دايرة بحال Nuisette غير هي كتكون شيك وماشي ديما حسبية. يا إما شفافة كلها أو غير من الصدر لتحت، بعض المرات طويلة حد الركبة أو اكثر. فيهم اللّي كيتحلو، يا إما بحزام فالوسط أو بصدفة جيهة الصدر وفيهم العاديين.  خفيفة ورطبة واللّبسة ديالها مرتاحة.

 

 

الـ Corset

كينزل من نص الصدر حد الوسط، الثوب ديالو صحيح ماشي خفيف بحال ديال Nuisette و Déshabillé، كان معمول فالأصل لأغراض طبية للناس اللّي عندهم مشاكل فالظهر. عزيز عند العيالات، حيت كيجمع الوسط، وكيعطي ديك الفورمة ديال يد المهراز، بمعنى صدر وترمة خارجين ونص مجموع. فيه فصالات بزاف، كاين اللّي كينزل بخويطات وكاين اللّي غير معلق، كاين اللّي كيتزير من القدام وكاين اللّي كيتزير من اللّور، فيهم اللّي كيجي بسليب و Les bas ديالو والسميطات وكاين اللّي كيجي بوحدو. فيهم اللّي طويل ونازل كيقولو ليه Basque، وفيهم اللّي كينزل بحال Mini jupe. تقدري تلبسيه بوحدو أو تلبسي فوقو Déshabillé شفاف ومفتوح.

 

الـ Bustier

الفصالة ديالو بحال ديال الـ Corset، الثوب ديالو صحيح وحدّو النّص. غير هو الـ Bustier بلاصة ما يجمع الوسط، كيجمع الصدر وكيدفعو للقدام. وكيعطي ديك الفورمة كورفي، كتبين الصدر كبير وخارج لبرا. كيكون عندو باش يتزير من اللّور وفيه اللّي قصير وكاين اللّي كينزل على الوسط بحال الـ Basque. اللّبسة ديالو كتعطي إحساس بالرشاقة والأنوثة.

 

 

 

الـ Teddy

كيكون نازل طرف واحد من الصدر حتى للتوتو بحال البيكيني، غير هو كيكون مطروز وشيك وما لاصقش بزاف. نازل ثوب أو خويطات، شفاف كلو أو بين وبين. فيه اللّي بالظهر وفيه اللّي Dos nu ، زعما عريان. غالبا كينزل بحال String وفيه اللّي كيتلبس بـ Les bas وسميطات. اللّبسة ديالو زوينة وكلاس.

 

 

الـ Ensemble

سوتيانات وسليب خيط أو عادي كيمشيو بجوج، كيكونو زوينين وشيـك، غير هوما قلال وصعيب تلقاي اللّي غادي يجيك لاصق. بزاف ديال المرات غادي يجيك سوتيان مقاد ولكن سليب ما مرتاحش، أو العكس. الطرز والزواق ديالو كيكون شيك وفاللّبسة كيجي زاز.

 

 

 

كيفاش تختاري لانجري اللّي يواتيك؟

ما كايناش شي حاجة كيصدق فيها داك المثل ديال لبس قدك يواتيك قد القضية ديال لانجري. وملّي كنقولو القد هنا ما كنقصدوش الطول والعرض، كنهضرو على الفصالة كُلها. باش تعرفي تختاري لانجري اللّي يجي معاك خاصك تكوني عارفة الفصالة والطبيعة ديال الجسم ديالك.

العيالات بصفة عامة فيهم خمسة ديال الفصالات:

  1. فصالة قد قد، وهي فاش كيكون النص العلوي، بمعنى الصدر والكتاف، قد النص التحتاني، زعما الترمة، والوسط مجموع. بحال رقم ثمنية.
  2. الفصالة ديال قالب السكار: معشوقة الجماهير، هي فاش كيكون النص الفوقاني، زعما الكتاف والصدر، صغر من النص التحتاني. ومع كيكون الوسط مجموع، كتبان الترمة كبيرة. وهذا ما يُصطلح عليه بإسم: الطّرفْ.
  3. فصالة مقادّة: هي فاش كيكون قد الكتاف والصدر، قد الوسط، قد المؤخرة، ما كايناش تضاريس. هاد الفصالة كتكون غالبا عند العيالات اللي كيديرو الرياضة، خصوصا الرياضات اللّي كتحرق بزاف ديال السعرات الحرارية.
  4. الفصالة فريميجة: بمعنى الصدر والكتاف عراض أو كبار، الوسط مقاد، والمؤخرة مجموعة. كتكون عند البنات اللّي كيديرو مجهود أو رياضة كتخدم الكتاف والظهر بزاف، بحال الحديد.
  5. الفصالة المدورة: هي فاش كيكون النص الفوقاني، والنص التحتاني صغر من الوسط، كيكون الوسط كبير نسبيا وكيعطي انطباع بجسم ما مفصّلش. فالغالب كتكون عند العيالات اللّي هازين شوية ديال الشحمة وعندهم كريشة.

الموفيد…

إذا كانت الفصالة ديالك قد قد، غالبا أي حاجة غادي تجي معاك، وما غديش تصيبي صعوبة تلقاي اللّي يواتيك. ولكن مزيان تاخدي شي حاجة اللّي تعطي للعين وتزيد تبين الفصالة، بحال Teddy شيك أو شي Corset  بالسميطات ديالو. أو Ensemble كلاس، غادي يجيك صداع.

أما إذا كانت الفصالة ديالك قالب ديال السكار، غادي يكون الفيلم كلو ضاير على الطّرفْ. إذا بغيتي شي حاجة اللّي تغطيه وما يبانش كبير مقارنة مع النص الفوقاني، خودي  Déshabilléزوين، يكون مجموع تحت الصدر ومسرسب على الباقي. الـ Bustier حتى هو غادي يجيك زاز، حيت غادي يهز ليك الصدر، وغادي يبان كبير، منفوخ وخارج لبرا، الشّي اللّي غادي يبين الفصالة متناسقة. أو خودي Ensemble شيـك، بسوتيانات دانتيل أو بشي ديكور، ماشي حسبيين باش يبان الصدر، غادي يجيك شيك.

إذا كانت الفصالة ديالك مقادّة، لانجري كيجمع الوسط غادي يجيك زوين، حيت غادي يبين الصدر والمؤخرة، ويعطيك طاي كورفي. بحال شي Corset زوين، أو إذا بغيتي شي حاجة مرتاحة اكثر، خودي ليك شي حاجة بين الـ Déshabillé و الـ Bustier، تكون مجموعة من لفوق باش تجمع الصدر وطلعو شوية، ومطلوقة من لتحت.

فحالة ما كانت الفصالة ديالك فريميجة، لانجري اللّي غادي تختاري مرتبط بشنو باغية تبيني اكثر وشنو باغية تغطي. إذا باغية تبيني الكتاف ديالك صغار، تفاداي لانجري عادي وخودي لانجري Dos nu، يعني ظهرو عريان ودايز غير بخيط على الرقبة. إذا كانت المؤخرة ما بايناش مع الظهر، خودي Teddy، حيت كيكون مجموع وكيقاد الفصالة. تقدري تاخدي Ensemble camisole، بمعنى كاميسول بالسليب ديالو، يكون خويطات ومتيسع، غادي يجيك زوين.

أما إذا كانت الفصالة ديالك مدورة، الـ Déshabillé غادي يجي معاك، من جهة كيغطي الوسط ومن جيهة اخرى كيبين الصدر. خصوصا إذا كان كيتجمع من لفوق. تقدري تاخدي Teddy حيت كيقسّم الفصالة وكيعطيها التفاصيل، غير هو يقدر يجيك بعض المرات مخنوق. إذا ما بانش ليك فهادشي، خودي سوتيانات وسليب يعجبوك، يكونو لون غامق، ولبسي عليهم Nuisette  مفتوحة وشفافة، غادي يجيوك كلاس.

الحاصول

لانجري فيه وفيه، كاين اللّي مصايب من الحرير، كاين ديال الثوب والنّيلو. حاولي تاخدي لانجري الجودة ديالو مزيانة. واخا غالي شوية، ولكن اعتابريه استثمار. كاين لانجري رخيص ولكن مصايب بمواد اللّي تقدر تسبب ليك حساسية أو ضّر الجلد إذا كانت البشرة ديالك حساسة. ما تحشميش تجربي شي حاجة جديدة وفشكل، حيت هادو ملابس حميمية، ماشي الحوايج ديال الخروج اللّي غادي تديري فالاختيار ديالهم بحساب البراني. ما تنسايش بلّي لانجري والملابس الداخلية ماشي ضروري يكونو قد قد، عادي إذا خديتي لانجري وافي عليك شوية المهم تكوني مرتاحة فيه. وديري فالبال بلّي راه كيتصَبن باليد باش ما يخسرش، وماشي فالماكينة.

خلّي تعليق

الإيميل ديالك ما غاديش يبان للناس.